搞黎搞去都係解決唔到問題
【技術討論】點解和理傾完仲衰過無傾？
香港特首林鄭噚晚（26日）喺港島搞咗首場「和理傾社區對話」，成效點樣？傍晚臨收工嗰陣整咗個字雲（Word Cloud）嚟，睇睇究竟網民留言講乜嘢多，字愈大就代表嗰組字出現嘅頻率愈高。彩色嘅係林鄭 Facebook 噚日中午出嘅帖文入面嘅留言，黑白嗰個就係今日（27日）下晝近3點出嘅帖文，你會發現「五大訴求」同相關嘅字詞，佔嘅大細同範圍係仲大咗！
**證明咗啲乜？大家對爭取「五大訴求」係更堅定！**
對話個重點係大家互相都可以「講、回應、跟進」，但噚日個 150 人「社區對話」，可以發問嘅只有 30 個，淨返嗰 8 成人全部淨係嚟聽，講得衰啲，佢哋嚟做媒體報導同直播嘅佈景版？然後呢 30 人入面，每 6 個市民發問完先至有 1 次林鄭嘅 3 分鐘答問題，仲要揀嚟覆，而唔係逐個提問都去答喎！咁唔答嘅問題，係咪代表無收到呢？
**總結好重要，跟進更加重要**
咁嘅格局，事實係比記者會更加「唔理想」，對大眾甚至出席嘅市民嚟講，係「唔完美」而且「唔可以接受」。今次對話的目的，唔止剩係聆聽訴求，而係要回應同跟進，大家講完一大堆，無一個總結，之後點跟進呢？如果無跟進，下場只會係重覆低效嘅溝通，講完又唔知你會唔會做，大家又點會收貨？
最簡單嘅例子，會考 DSE 都有說話考試嘅部份，小組討論個個都要(1)講嘢，(2)要回應人哋講嘅論點，同埋(3)做個總結歸納大家講過嘅嘢。中學生都識，無理由作為香港政府嘅首長都唔識下化？
**對話101：平等參與、真誠交流**
成個「社區對話」嘅安排仲有好多改善嘅地方，其實簡單複述個問題，嚟個小總結，已經俾對方知道你有聽佢講嘢，而唔係各自表述。
更重要嘅係，要俾每個人有親口發問嘅機會之餘，會唔會可以寫出嚟，貼喺林鄭後面塊 backdrop？嫌連儂牆民主牆太敏感嘅，叫意見板好未？完咗個對話會，林鄭同個 backdrop 影返張相，然後政府將呢啲意見數碼化擺上網，證明政府係有收到意見！
往後嘅發展，如果政府真係要廣納市民意見，一定要將對話規模縮減，仲要將對話嘅出席人士分門別類，包含社會唔同階層，會面結果輯錄成書 / 網上報告，大家都有得去跟進，咁先至係一個負責任同民主嘅政府要做嘅事。
#和理傾 #讓之後每一位都唔係佈景板 #真誠對話平台 #對話要真誠先至好 #平等參與 #香港要搵出路 #林鄭月娥 #CarrieLam
Search